Fyrirtækið vinnur að þróun á hágæða líftæknilyfjahliðstæðum, en líftæknilyf eru afar áhrifarík og hafa gefið góða raun í meðhöndlun á erfiðum sjúkdómum eins og gigt, sóríasis og krabbameini.  

Höfuðstöðvar og hátæknisetur Alvotech sem staðsett er í Vísindagörðum Háskóla Íslands í Vatnsmýri, er búið fullkomnustu tækjum og búnaði til þróunar og framleiðslu líftæknilyfja. Þar fer öll framleiðsla lyfjaefnanna í líftæknilyfjahliðstæðurnar fram. Framkvæmdum er að ljúka við stækkun aðstöðunnar í Vatnsmýri sem þá verður um 26.000 fm að stærð, og eru verklok áætluð á árinu 2024.

Móðurfélag Alvotech, Alvotech S.A. er skráð í Lúxemborg, en öll þróun, framleiðsla og rekstur, er í höndum Alvotech hf., sem er til heimilis á Íslandi. Hlutabréf Alvotech hafa verið tekin til til viðskipta á Nasdaq markaðnum í Bandaríkjunum og aðalmarkaði Nasdaq á Íslandi. Auk höfuðstöðvanna í Reykjavík, er fyrirtækið er einnig með starfsemi í Bandaríkjunum, Bretlandi, Þýskalandi, Indlandi og Sviss. Í Mars 2024 störfuðu rúmlega 1000 vísindamenn og sérfræðingar af um 65 þjóðernum hjá fyrirtækinu, þar af rúmlega 800 á Íslandi. 

Sem hluti af Vísindagörðum Háskóla Íslands er fyrirtækið þátttakandi í öflugu samstarfi háskólans og alþjóðlegra þekkingar- og hátæknifyrirtækja sem miðar að því að efla vísindastarf, þekkingarmiðlun og nýsköpun og þannig laða hæfileikaríka innlenda og erlenda sérfræðinga til starfa.

Alvotech hefur gert samstarfssamninga við mörg leiðandi lyfjafyrirtæki á meira en 90 alþjóðamörkuðum um sölu, markaðssetningu og dreifingu á lyfjum fyrirtækisins.

Alvotech vinnur út frá þeirri meginreglu að ef til er lækning, þá á hún að vera í boði fyrir alla.